Qredits ta entrega prome Microfiansa na Aruba

Qredits ta entrega prome Microfiansa na Aruba

08-06-2017 ArubaMicrofiansa

Awe e prome  Microfiansa di Qredits Aruba a keda entrega na empresario Ydimar Zerraga. Cu e inversion aki Ydimar ta desea di realisa su soño pa amplia su empresa ‘You and I Lingerie’.  Desde comienso di april Qredits ta activo na Aruba: empresarionan nobo y esnan existente por ricibi un fiansa te cu Afl. 50.000,- pa lanta of expande nan negoshi.

Di forma simbolico, a haci entrega di e cheque na Ydimar na oficina di Qredits den MFA Nort. Ydimar ta un empresario local y ta maneha su propio negoshi di paña ya pa un aña caba. Aki e ta bende lingerie pa damanan plus-size. Cu e Microfiansa aki e kier realisa mas cresemento pa su comapnia.

Qredits Aruba tin como meta pa reforsa e mundo comercial aki na Aruba ofreciendo fiansanan te cu Afl. 50.000,- na empresarionan existente i nobo i alaves tambe coaching. Desde su apertura na april un cantidad di empresario (starters) a bati na porta cerca Qredits pa entre otro sosten financiero.

E metanan pa 2017/2018 ta pa suministra mas o menos 100 fiansa cu un promedio di Afl. 30.000,- pa guia mas di 200 empresario nobo ora di lanta nan propio negoshi y pa ofrece e programa educativo empresarial Birando mi Mesun Doño na 250 alumno di scol.

E curso online di Qredits Skirbi Bo Plan di Negoshi ta traduci na Papiamento, Ingles y Spaño y ta keda ofreci na empresarionan nobo. Pa cu esaki tin vouchers obtenibel na oficina di Qredits y na Camara di Comercio. Te cu awor ya mas cu 30 vouchers a keda reparti.

Bo por haya mas informacion di Qredits Aruba riba www.qredits.com. E website ta obtenibel den cuatro idioma: Papiamento, Hulandes, Ingles y Spaño. Aplicacion pa un fiansa por wordo haci simpelmente riba e website mes.

Qredits ta entrega prome Microfiansa na Aruba